RRETH NESH
OLIMPIADA XXI KOMBËTARE "UDHA E SHKRONJAVE" ®
Olimpiada XXI Kombëtare "Udha e shkronjave" ® synon të nxjerrë në pah arritjet e nxënësve më të shkëlqyer të Shqipërisë në klasat 1-12 në lëndët: matematikë, gjuhë shqipe, shkencë (biologji, kimi, fizikë) dhe Kompetencë Globale ®. Për klasat 1-8 është periudha shtator 2021 dhe për klasat 9-12 regjistrimet janë në periudhën gusht 2021, ndërsa garat fillojnë në prill (parashkollorët) dhe mbarojnë në shtator 2021 (klasat e tjera). Për klasat 1-8 teza hartohet nga "Udha e shkronjave" ® ndërsa për klasat 9-12 kryesisht hartohet nga Cambridge Assessment International Education, që janë tezat e provimeve Cambridge IGCSE, për lëndët matematikë, biologji, kimi, fizikë. Për klasat 9-12 kriter për të marrë medalje është vlerësimi me notën A* në certifikatën Cambridge IGCSE.
Rreth 100 nxënës vlerësohen me çmime
Rreth 100 nxënës marrin çmime çdo vit, në të katër garat për klasat 1-12.
Nxënësit parashkollorë marrin certifikata me vlerësimet "Shkëlqyeshëm", "Shumë mirë" dhe "Mirë". Nxënësit e vendeve të para marrin medalje, diplomë dhe troffe. Nxënësit e vendit të dytë dhe të tretë marrin medalje, dhe diplomë. Vitet e fundit diplomat janë të punuara në mënyrë artizanale në bakër.
REGJISTRI I AMZËS SË OLIMPIADËS KOMBËTARE "UDHA E SHKRONJAVE" ®
Për të gjitha olimpiadat kombëtare që janë zhvilluar nga shkolla "Udha e shkronjave", tashmë kemi një regjistër amze, që do të thotë se nxënësi i interesuar për të ditur rezultatet e tij historike tashmë do të ketë këtë mundësi.
Përshëndetje e prof.dr. albert frashëri
Të dashur nxanës, qytetarë të Shqipërisë së ardhshme, të nderuar mësues të “Udhës së shkronjave”,
Nuk munda të përfitoj nga bujaria Juaj duke më ftuar të isha i pranishëm në këtë ngjarje të shënuar të vitit të ri shkollor. Rrethanat nuk ma sollën të mundur ta kem këtë kënaqësi, por kam menduar vazhdimisht këto ditë për mësuesit dhe stafin drejtues të shkollës suaj, që sipas mendimit tim të përunjur, kanë një koncept thellësisht demokratik e modern për të mësuarit.
Përse kjo bindja ime?
Shkolla juaj sheh formimin e qytetarit si qellim kryesor të arsimimit. Në këtë formim ata përpiqen të ndërtojnë përmes përvojave pozitive e të përparuara, aspektin kulturor e atë shkencor të formimit tuaj.
Formimi i njeriut përmes shkollës, si qytetar i ardhshëm i një shoqërie demokratike, ka vërtet nevojë për lëndë shkencore e humanistike, ku gjuha amtare dhe matematika luajnë një rol të dorës së parë në çdo vend të botës. Por ju me sa kuptoj unë, nuk kini krijuar asnjë hierarki të lëndëve, por në ecjen tuaj keni vlerësuar njëlloj të gjitha disiplinat.
Kjo mendoj bën që proçesi i formimit tuaj të ketë një ekulibër të vërtetë e, për pasojë, të zhvillohet në harmoni me të gjitha kërkesat që natyra ka paracaktuar për formimin e njeriut.
Ekuilibri e harmonia për të cilën fola më lart, janë shprehje edhe e të së Bukurës që do të jetë gjithmonë më e pranishme në qënien tuaj. Që nga koha e Sokratit dhe e Platonit, e Bukura shihet si shprehje e Mirësisë, të cilën nuk duhet ta largoni nga shpirti dhe vepra juaj. Të konceptosh, në vend të një Olimpiade matematike apo të fizikës, një tjetër olimpiadë që krahas formimit shkencor, sheh edhe formimin e përgjithshëm të nxanësit, do të thotë që shkolla nuk synon aspekte thjesht teknike të përgatitjes suaj, por thelbin e njeriut që shkolla krijon së bashku me familjen. Mendoj që ky ashtë një hap i madh, i guximshëm e modern në idenë themelore të të mësuarit. Jam i bindur për sa them sepse e Juaja ashtë një shkollë që formon njeriun e jo thjesht pamjet teknokrate te tij. Dua të mbroj këtë bindej timen për punën që bëjnë mësuesit dhe drejtuesit tuaj, duke cituar qytetarin e madh të shekullit të kaluar, Albert Einstein:
Së pari: “Duhet të kemi kujdes të mos e shohim intelektin si një Zot; intelekti ka, natyrisht, muskuj të fuqishëm, por asnjë personalitet.”
Së dyti, shikoni sa përputhet mendimi i këtij njeriu të madh, me realitetin e shkollës suaj, kur thotë:
“Shkolla duhet të kujdeset që i riu të formojë një personalitet harmonioz e jo i katandisur në një specialist. Përndryshe, përfundon Einstein, me atë specializmin e tij, i riu më shumë se çdo gjë do të ngjante me një qen të stërvitur mirë.” [“New York Times”, 5 tetor 1952]
Ideja që formimi të njeriut duhet të jetë qëllimi kardinal i shkollës, ashtë përpunuar mrekullisht nga Rilindasit tanë që ju i studjoni me aq kujdes e dashuri.
Paçi mbarësi në punën tuaj fisnike e qofshi një model për të gjithë sistemin arsimor të vendit.
Albert Frashëri
* Përshëndetja dërguar me rastin e Ceremonisë Festive të ndarjes së Çmimeve të Olimpiadës XIII Kombëtare dhe të çeljes së vitit shkollor 2013-2014, organizuar nga “Udhae shkronjave”, më 1 shtator 2013.
* Prof.Dr Albert Frashëri, banues në Umbria (Italy), titullar në katedrën e matematikës dhe të fizikës në licetë shkencorë të Viterbo, Parma dhe, në 10 vitet e fundit të karrierës, në Liceun Shkencor “A. Volta” në Spoleto. Lindur në Shqipëri, (me qytetari italiane që nga lindja), ku ka punuar deri në 1990, si studiues (kërkues) pranë Departamentit të Matematikës të Institutit Kombëtar të Kërkimeve mbi Arsimin. Në vitet e fundit të qëndrimit në Shqipëri ka qenë përgjegjës i departamentit. Fushë e kërkimit ishte reforma e arsimit matematikor në shkollat e çdo cikli dhe klase dhe që lidhej me përmbajtjet dhe metodologjitë e mësimdhënies.
investoni në shkëlqimin e nxënësve shqiptarë
Ftesë për bizneset dhe fiset
Olimpiada Kombëtare “Udha e shkronjave” është në vitin e nëntëmbëdhjetë të saj. Mijëra nxënës nga Shqipëria dhe Kosova kanë marrë pjesë në olimpiadat tona kombëtare dhe lokale që nga viti 2000. Shumë prej fituesve dhe pjesëmarrësve të dikurshëm sot studiojnë ose kanë përfunduar studimet në universitetet më të mira në botë Harvard, Stanford, MIT, Cambridge, Princeton, etj.
Olimpiada XIX Kombëtare “Udha e shkronjave” është një konkurrim në katër gara njëkohësisht dhe me të njëjtët nxënës: në matematikë, në gjuhë shqipe, në shkencë dhe në kompetencë globale. Sivjet, do të zhvillohet në datat 1-9 qershor 2019 në Tiranë në mjediset e shkollës “Udha e shkronjave”, rruga “Qemal Stafa”, nr. 124.
PSE KËRKOHET NDIHMA JUAJ?
Pjesëmarrja në Olimpiadën Kombëtare kushton dhe kostoja përfshin jo vetëm tarifën e olimpiadës (5000 lekë) por edhe shpenzimet e udhëtimit që bëjnë vetë prindërit për të marrë pjesë në olimpiadë.
Shumë nxënës të shkëlqyer që duan ta ndjekin olimpiadën nuk kanë mundësi ta realizojnë këtë dëshirë, pikërisht për shpenzimet që ajo ka.
Mospjesëmarrja në të tilla veprimtari bën që ata a) të mos e zhvillojnë shkëlqimin e tyre, b) të mos matin arritjet e tyre, c) të mos vihet në pah potenciali që kanë, ç) të mos bëhen të dukshëm d) të mos përfitojnë mundësira të tjera financiare dhe si pasojë të humbasin konkurrencën për më tej vetëm se nuk kanë mundësi ekonomike, duke patur një potencial shumë të mirë.
Shkëlqimi i tyre ka nevojë të vihet në pah në një mënyrë ose në një tjetër.
Duke thelluar ne punën në cilësinë dhe thellësinë e olimpiadës që kemi, (fillimisht kishim një garë, pastaj dy, pastaj tre dhe tani katër gara), çmimi u rrit dhe kjo ka edhe efektin negativ. Ne duam të mbajmë cilësinë, por nuk mundemi ta mbajmë pa mbështetje financiare.
Çfarë gjëje pozitive do të ndodhte nëse investoni?
Ne mendojmë se investimi për shkëlqimin e një fëmijë nëse jeni biznes sjell një pozitivitet në mjedisin tuaj shoqëror, në punonjësit tuaj, në fisin tuaj. Fëmija tek i cili investoni arrin të bëhet frymëzues përmes përkushtimit të tij dhe arritjeve. Ju e veçoni atë dhe e bëni shembull.
Për fiset është domethënëse të investojnë në shkëlqimin e atij që e meriton. Nxënësi i shkëlqyer duhet përgatitur që të trashëgojë e drejtojë në të ardhmen fisin e vet. Kjo e mban të bashkuar fisin dhe sidomos brezin e ri rreth gjakut.
Kush mund ta meritojë investimin tuaj?
- Fëmija e një punonjësi tuaj. Ju mundet të investoni në shkëlqimin e një punonjësi tuaj dhe është e natyrshme që kjo do të rritë përkushtimin e vetë punonjësit apo të kolektivit që kupton kujdesin tuaj për shkëlqimin. Mund ta kuptoni vlerësimin që një punjës ka për stafin drejtues ta zemë në një rrobaqepësi, në një fabrikë, në një restorant nëse drejtoria i thotë se do të investojë për tarifën e olimpiadës dhe shpenzimet e udhëtimit që fëmija të marrë pjesë në Olimpiadë Kombëtare.
- Fëmija e një klienti tuaj.
- Fëmijët e komunitetit ku ju jetoni ose punoni. Vetë ne si shkollë "Udha e shkronjave" kemi investuar në fëmijët e Institutit që nuk shikojnë "Ramazan Kabashi" dhe jo vetëm jemi ndjerë mirë për këtë dhe u kemi sjellë gëzim atyre fëmijëve, por e kemi edhe pjesë të krenarisë si shkollë këtë fakt.
- Fëmijët e fisit tuaj.
NJË SHEMBULL INVESTIMI: "Udha e shkronjave" ka marrë dhuratë 1000 euro nga familja Seranaj, prindër të dy nxënësve tanë të shkëlqyer Sibora dhe Darli Seranaj. Këtë fond ne tashmë do ta kanalizojmë për të ftuar pa pagesë 25 nxënës nga Kosova. (LINK)
Nëse ju doni të bëheni të dukshëm
Atëherë kërkesën tuaj për të investuar dhe kriteret tuaja i vendosim në faqen tonë të internetit dhe nxënësit që i plotësojnë kushtet marrin investimin tuaj. P.sh. Ju thoni "Të jetë në fillore dhe të jetë nga filan qytet dhe të ketë edhe këto kushte ... ". Në certifikatën që ne i japim nxënësit vendosim edhe emrin tuaj "pjesëmarrja siguruar përmes bursës së ofruar nga ...."
Si mund të investoni në nxënësit e shkëlqyer?
Drejtpërdrejt. Ju zgjidhni nxënësit (nga stafi, komuniteti, klientela) dhe u ofroni atyre pagesën e pjesëmarrjes në olimpiadë (mund të përfshihet edhe udhëtimi).
Përmes Olimpiadës Kombëtare. Nëse ju bashkoni me ne, atëherë investimi juaj në cilësi bëhet i dukshëm. Ju na ofroni kriteret (supozojmë të jetë nga kjo shkollë, ose nga ky qytet, ose në këto kushte familjare etj.) dhe mundohemi të gjejmë pikërisht nxënësit që ju keni piketuar.
Për shembull, vetë “Udha e shkronjave” investon në nxënësit e verbër, duke u ofruar atyre jo vetëm regjistrimin pa pagesë, por libra dhe mbështetje tjetër.
Njohja e investimit tuaj
Pasi ne gjejmë nxënësit që ju keni piketuar përmes kritereve, ne i lëshojmë nxënësit një certifikatë burse të Olimpiadës Kombëtare që vë në dukje personin apo institucionin që ka bërë të mundur pjesëmarrjen e tij në Olimpiadën Kombëtare.
Në faqen www.olimpiadakombetare.com në të gjitha njoftimet e Olimpiadës Kombëtare vendoset emri i biznesit apo personit që ka investuar në bursat për Olimpiadën XIX Kombëtare, 1-9 qershor 2019.
Për të shprehur interesin tuaj na shkruan në info@udhaeshkronjave.edu.al ose na telefononi në 692076068.
NA SHKRUANI
Olimpiada Kombëtare "Udha e shkronjave"
rr. Qemal Stafa, 124, Tiranë
Cel. 0692076068